Risaulai... hati denai ko
Tasintak denai di tangah malam
Tajado dek ulah mimpi
Rasonyo Mande maimbau pulang ondeh..
Untuang denai barunyo lapeh makan
Dapek pagi habihnyo malam
Acok bakicuah galang-galang
Den bujuak jo lalok salayang
Musim pabilo..
Denai ka pulang ondeh yo..
Lah didulang ameh didulang
Tiok didulang baserak juo
Banyak malang pakaro malang
Yo ndak samalang untuang ambo
Banyak malang pakaro malang
Yo ndak samalang untuang ambo
Oi palangkik di lereang bukik
Bukik banamo lereang capo
Di rantau pitih lah sariak
Kok ka pulang malu rasonyo
Di rantau pitih lah sariak
Kok ka pulang malu rasonyo
Iyo marasai badan ambo ko
Bilo tajalang tanah tapian
Yo di ladang lah tumbuah padi
Nan di sawah lah tumbuah banto
Muluik galak bathin manangih
Aia mato balulua sajo
Muluik galak bathin manangih
Aia mato balulua sajo
Urang tanjuang pai ka pakan
Hari Jumaik rami balainyo
Mande kanduang tolong doakan
Untuang tacapai cito-cito
Mande kanduang tolong doakan
Untuang tacapai cito-cito
Mande di kampuang saba lah dulu
Lamo jo lambek denai ka pulang